لندن۔28مارچ (پاکستان ایکسپریس ورولڈ نیوز):فروری 2022 میں یوکرین جنگ شروع ہونے کے بعد سے روس سے کارپوریٹ انخلا نے غیر ملکی کمپنیوں کو 107 ارب ڈالر سے زیادہ کا نقصان پہنچا اوران کو مجموعی آمدنی میں کمی کا سامنا کر نا پڑا۔
رائٹرز کی رپورٹ کے مطابق فروری 2022 میں یوکرین میں ماسکو کے خصوصی فوجی آپریشن کے آغاز کے بعد گزشتہ سال اگست تک روس سے انخلا کرنے والی غیر ملکی کمپنیوں کے نقصانات کے حجم میں ایک تہائی اضافہ ہوا ہے، جو کارپوریٹ شعبے کا ایک بڑا مالی نقصان ہے۔ عالمی رسک کنسلٹنسی ایس۔ آر ایم کی کارپوریٹ انٹیلی جنس ای ایم ای اے کے سربراہ ایان میسی کے مطابق وہ کمپنیاں جو اب بھی روس سےاپنا کاروبار سمیٹنے کا ارادہ رکھتی ہیں، انہیں مزید مشکلات کا سامنا کرنا پڑے گا اور نقصانات کا سامنا کرنا پڑے گا۔
ایجنسی نے یالے سکول آف مینجمنٹ کی ایک رپورٹ کا حوالہ دیتے ہوئے کہا کہ گزشتہ دو سالوں میں تقریباً ایک ہزار کمپنیاں روسی مارکیٹ سے نکل گئیں۔ فرانسیسی کمپنی اوچن اور اطالوی لباس گروپ بینیٹن سمیت سینکڑوں غیر ملکی کمپنیاں اب بھی روس میں کام کر رہی ہیں ۔ روئٹرز نے کہا کہ روزمرہ کی اشیاء اور اشیاء خوردونوش کا بزنس کرنے والی کمپنیوں نے اس دلیل کی بنیاد پر کہ روس میں بڑی تعداد میں لوگ ان کی مصنوعات پر انحصار کرتے ہیں،روس سے مکمل انخلاسے گریز کیا ہے ۔
